ទំនាក់ទំនងព័ត៌មានទាន់ហេតុការណ៌ តាមរយះលេខ 012 65 53 88 / 015 96 27 27

Monday, 16 November 2026

ព្រះករុណាជាអម្ចាស់ជីវិតលើត្បូង និងឯកឧត្តមប្រធានាធិបតីបារាំង យាង និងអញ្ជើញជាអធិបតី ព្រះរាជពិធីសម្ពោធប្រាសាទមេបុណ្យខាងលិច.....


AKP សៀមរាប ថ្ងៃទី១៦ ខែវិច្ឆិកា ឆ្នាំ២០២៦—

ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងឯកឧត្តម អេម៉េនុយអែល ម៉ាក្រុង (Emmanuel Marcon) ប្រធានាធិបតីនៃសាធារណ្ឋបារាំង និងលោកជំទាវទី១ យាង និងអញ្ជើញជាអធិបតីដ៏ខ្ពង់ខ្ពស់បំផុត ព្រះរាជពិធីបញ្ចប់គម្រោងជួសជុល និងកាត់ខ្សែបូសម្ពោធប្រាសាទមេបុណ្យខាងលិច ដែលស្ថិតនៅចំកណ្តាលបារាយខាងលិច ក្នុងខេត្តសៀមរាប។

សូមបញ្ជាក់ថាបន្ទាប់ពីគម្រោងជួសជុល ប្រាសាទមេបុណ្យខាងលិច ទ្រង់ទ្រាយធំក្រោមកិច្ចសហប្រតិបត្តិការស្មើភាពគ្នារវាងកម្ពុជា និងបារាំង ត្រូវបានបញ្ចប់ ក្រោយចំណាយរយៈពេលជួសជុលដ៏លំបាកអស់១៤ឆ្នាំ (២០១២ - ២០២៦) និងចំណាយទឹកប្រាក់ប្រមាណ ១២លានដុល្លារសហរដ្ឋអាម៉េរិក មហាស្ថាបត្យកម្មនៅកណ្តាលផ្ទៃទឹកនេះ បានលេចរូបរាងយ៉ាងអស្ចារ្យបំផុតនៅពេលនេះ។











សម្តេចធិបតីនាយករដ្ឋមន្ត្រី អញ្ជើញទទួលបដិសណ្ឋារកិច្ចផ្លូវការ ឯកឧត្តមនាយករដ្ឋមន្ត្រីកាណាដា នៅវិមានសន្តិភាព.....


AKP ភ្នំពេញ ថ្ងៃទី១៦ ខែវិច្ឆិកា ឆ្នាំ២០២៦—

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញទទួលបដិសណ្ឋារកិច្ចផ្លូវការ ឯកឧត្តម ម៉ាក ខានី (Mark Carney) នាយករដ្ឋមន្ត្រីនៃប្រទេសកាណាដា នៅវិមានសន្តិភាព រាជធានីភ្នំពេញ នារសៀលថ្ងៃទី១៦ ខែវិច្ឆិកា ឆ្នាំ២០២៦ ក្នុងឱកាសដែលឯកឧត្តមនាយករដ្ឋមន្ត្រី អញ្ជើញមកបំពេញទស្សនកិច្ចផ្លូវការ និងចូលរួមពិធីផ្ទេរតំណែងប្រធានកិច្ចប្រជុំកំពូលហ្រ្វង់កូហ្វូនី នៅកម្ពុជា។








អាមេរិក ស្វាគមន៍កម្ពុជា ដែលបានចូលរួមចុះហត្ថលេខាលើសេចក្តីថ្លែងការណ៍រួម ស្តីពីភាពជាដៃគូសម្រាប់ឱកាសក្នុងវិស័យបញ្ញាសិប្បនិម្មិត (AI)....


AKP ភ្នំពេញ ថ្ងៃទី១៦ ខែវិច្ឆិកា ឆ្នាំ២០២៦--

សហរដ្ឋអាមេរិកបានស្វាគមន៍ព្រះរាជាណាចក្រកម្ពុជា ក្នុងនាមជាប្រទេសថ្មីមួយដែលបានចូលរួមចុះហត្ថលេខាលើសេចក្តីថ្លែងការណ៍រួមស្តីពីភាពជាដៃគូសម្រាប់ឱកាសក្នុងវិស័យបញ្ញាសិប្បនិម្មិត (AI)។ នេះបើតាមបណ្ដាញសង្គមហ្វេសប៊ុករបស់ស្ថានទូតសហរដ្ឋអាមេរិកប្រចាំនៅកម្ពុជា។

ប្រភពដដែលបានលើកឡើងថាកម្ពុជាបានចូលរួមជាមួយសហរដ្ឋអាមេរិក និងប្រទេសដៃគូចំនួន ៥៤ ផ្សេងទៀតនៅជុំវិញពិភពលោក ក្នុងការចែករំលែកចក្ខុវិស័យរួមមួយថា អនាគតនៃបញ្ញាសិប្បនិម្មិតពិសេស (Super Intelligence ឬ SI) គួរតែផ្អែកលើកិច្ចសហប្រតិបត្តិការដែលអាចទុកចិត្តបាន សន្តិសុខសេដ្ឋកិច្ច នវានុវត្តន៍ និងការប្រកួតប្រជែងដោយយុត្តិធម៌។

ឯកអគ្គរដ្ឋទូតសហរដ្ឋអាមេរិក ឯកឧត្តម គ្រីស្តូហ្វឺរ អ៊ែនដឺសឹន (Christopher Jon Anderson) បានអញ្ជើញចូលរួមជាមួយឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ក្នុងពិធីចុះហត្ថលេខាជាផ្លូវការលើសេចក្តីថ្លែងការណ៍រួមនេះ។

ពេលនេះ កម្ពុជាបានចូលរួមជាមួយសហរដ្ឋអាមេរិក និងប្រទេសដៃគូរបស់ខ្លួន ក្នុងការជំរុញវិធីសាស្ត្រដែលគាំទ្រកំណើនសេដ្ឋកិច្ច និងនវានុវត្តន៍ក្នុងវិស័យ SI ដោយផ្អែកលើអាទិភាពរួម រួមមាន ខ្សែច្រវាក់ផ្គត់ផ្គង់ដែលអាចទុកចិត្តបាន ការជំរុញការចូលរួមពីវិស័យឯកជន និងការកសាងហេដ្ឋារចនាសម្ព័ន្ធដែលនឹងក្លាយជាកម្លាំងចលករសម្រាប់សតវត្សរ៍ខាងមុខ។

តាមរយៈកិច្ចសហប្រតិបត្តិការរួមគ្នា យើងនឹងកសាងអនាគត SI ដែលបម្រើផលប្រយោជន៍ប្រជាជនរបស់យើង ពង្រឹងសេដ្ឋកិច្ចរបស់យើង និងផ្តល់អំណាចដល់សហគ្រិនភាព នវានុវត្តន៍ និងនីតិរដ្ឋ៕ ដោយ៖ ប៊ុនរិទ្ធ




សម្តេចធិបតី ហ៊ុន ម៉ាណែត៖ កិច្ចប្រជុំកំពូលហ្រ្វង់កូហ្វូនីលើកទី២០ ប្រែក្លាយសសរស្តម្ភ៣ ទៅជាសកម្មភាពជាក់ស្តែង តាមរយៈសេចក្តីថ្លែងការណ៍ទីក្រុងភ្នំពេញ.....


AKP ភ្នំពេញ ថ្ងៃទី១៦ ខែវិច្ឆិកា ឆ្នាំ២០២៦--

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានគូសបញ្ជាក់យ៉ាងមុតមាំថា សន្តិភាព វិបុលភាព និងស្ថិរភាព គឺជាធាតុផ្សំដែលមិនអាចកាត់ផ្តាច់ពីគ្នាបានឡើយ ហើយកិច្ចប្រជុំកំពូលហ្វ្រង់កូហ្វូនីលើកទី២០ បានប្រែក្លាយពាក្យគន្លឹះទាំងបី គឺ «ការបង្ការ ការត្រៀមលក្ខណៈ និងការរីកចម្រើន» ឱ្យទៅជាសកម្មភាពជាក់ស្តែង តាមរយៈសេចក្តីថ្លែងការណ៍ទីក្រុងភ្នំពេញ។

ថ្លែងក្នុងពិធីបិទកិច្ចប្រជុំកំពូលហ្វ្រង់កូហ្វូនីលើកទី២០ នៅរាជធានីភ្នំពេញ នារសៀលថ្ងៃទី១៦ ខែវិច្ឆិកា ឆ្នាំ២០២៦ សម្តេចធិបតី ហ៊ុន ម៉ាណែត បានលើកឡើងពីទំនាក់ទំនងយ៉ាងជិតស្និទ្ធរវាងសន្តិភាព និងការអភិវឌ្ឍសេដ្ឋកិច្ច ដោយសង្កត់ធ្ងន់ថា «សេចក្តីថ្លែងការណ៍ទីក្រុងភ្នំពេញ បានបញ្ជាក់ពីការពិតដ៏សាមញ្ញមួយ គឺសន្តិភាព វិបុលភាព និងស្ថិរភាព ត្រូវតែដើរទន្ទឹមគ្នា។ សន្តិភាពដែលគ្មានវិបុលភាព គឺជាសន្តិភាពដ៏ផុយស្រួយ។ វិបុលភាពដែលគ្មានសន្តិភាព គឺជារឿងដែលមិនអាចទៅរួចឡើយ។ ហើយបើគ្មានស្ថិរភាពទេ ទាំងសន្តិភាព និងវិបុលភាព ក៏មិនអាចស្ថិតស្ថេរបានដែរ»។

ពាក់ព័ន្ធនឹងសសរស្តម្ភចំនួនបី ដែលក្នុងនោះទី១. «ការបង្ការ» សម្តេចនាយករដ្ឋមន្ត្រីបានបញ្ជាក់ថា អង្គការហ្វ្រង់កូហ្វូនីបានសម្រេចពង្រឹងតួនាទីរបស់ខ្លួនក្នុងការបង្ការវិបត្តិ និងការសម្រុះសម្រួល ដោយសហការជាមួយអង្គការសហប្រជាជាតិ និងអង្គការតំបន់នានា។ សម្តេចធិបតីបានមានប្រសាសន៍ថា ការបង្ការ គឺជាការធ្វើសកម្មភាពទាន់ពេលវេលា ខណៈដែលកិច្ចសន្ទនានៅតែអាចធ្វើទៅបាន ពោល គឺជាការស្តាប់គ្នាមុនពេលដែលកំហឹងប្រែក្លាយទៅជាអំពើហិង្សា។ សម្តេចធិបតីបានបន្ថែមថា សន្តិភាពពិតប្រាកដមិនមែនកើតចេញពីការចុះហត្ថលេខារវាងរដ្ឋ និងរដ្ឋតែប៉ុណ្ណោះទេ ប៉ុន្តែត្រូវកសាងឡើងដោយមានការចូលរួមពីប្រជាជន ស្ត្រី យុវជន និងសង្គមស៊ីវិល។

ចំពោះសសរស្តម្ភទី២៖ «ការត្រៀមលក្ខណៈ» ដោយសម្តេចធិបតីបានផ្តោតការយកចិត្តទុកដាក់លើការវិវត្តយ៉ាងឆាប់រហ័សនៃបច្ចេកវិទ្យាបញ្ញាសិប្បនិម្មិត (AI) និងបញ្ហាបម្រែបម្រួលអាកាសធាតុ។ សម្តេចធិបតីបានថ្លែងសង្កត់ធ្ងន់អំពីអនាគតនៃភាសាបារាំង ក្នុងយុគសម័យឌីជីថល និងបញ្ហាបរិស្ថានយ៉ាងដូច្នេះថា «បញ្ញាសិប្បនិម្មិត (AI) កំពុងផ្លាស់ប្តូរពិភពលោករបស់យើងរួចទៅហើយ។ យើងបានធ្វើការជ្រើសរើសមួយគឺការជ្រើសរើសប្រកបដោយទំនួលខុសត្រូវ យើងចែករំលែកចំណេះដឹងរបស់យើង និងការពារអ្នកបង្កើតស្នាដៃរបស់យើង។ ចំពោះភាសាបារាំងត្រូវតែមានវត្តមានរស់រវើកនៅក្នុងប្រព័ន្ធទិន្នន័យ ព្រោះភាសាណាដែលអវត្តមានពីបច្ចេកវិទ្យានាពេលបច្ចុប្បន្ន នឹងត្រូវបាត់បង់ពីការសម្រេចចិត្តនានាក្នុងពេលឆាប់ៗខាងមុខ។ ការត្រៀមលក្ខណៈសម្រាប់អនាគត ក៏ជាការការពារភពផែនដីផងដែរ វិបត្តិអាកាសធាតុនាពេលបច្ចុប្បន្ន គឺជាវិបត្តិសន្តិភាពនាពេលអនាគត»។

ដោយឡែក សម្រាប់សសរស្តម្ភទី៣ គឺ «ការរីកចម្រើន» ដោយសម្តេចមហាបវរធិបតីបានប្រកាសពីសមិទ្ធផលដ៏សំខាន់មួយសម្រាប់កម្ពុជា និងតំបន់ ដោយកិច្ចប្រជុំកំពូលបានសម្រេចបង្កើត «ការិយាល័យសហប្រតិបត្តិការសេដ្ឋកិច្ចហ្វ្រង់កូហ្វូនី» នៅរាជធានីភ្នំពេញ។ សម្តេចធិបតី ហ៊ុន ម៉ាណែត ក៏បានថ្លែងអំណរគុណចំពោះទំនុកចិត្តរបស់អង្គការហ្វ្រង់កូហ្វូនី ដោយរំពឹងថាការិយាល័យនេះនឹងក្លាយជាស្ពានតភ្ជាប់យ៉ាងសំខាន់រវាងសហគមន៍ហ្វ្រង់កូហ្វូនី ជាមួយតំបន់អាស៊ាន និងសហគមន៍ប៉ាស៊ីហ្វិក។

ជាមួយគ្នានេះ សម្តេចធិបតីនាយករដ្ឋមន្រ្ដីក៏បានធ្វើការអំពាវនាវយ៉ាងទទូចឱ្យមានការរួមគ្នាការពារ និងថែរក្សាបេតិកភណ្ឌវប្បធម៌ ដែលជាដួងព្រលឹង និងការចងចាំរបស់ប្រជាជាតិនានា ដើម្បីផ្ទេរបន្តទៅមនុស្សជំនាន់ក្រោយ ដោយសម្តេចបានលើកឡើងជាឃ្លាប្រកបដោយអត្ថន័យជ្រាលជ្រៅថា «នៅពេលដែលប្រាសាទមួយរងការបំផ្លិចបំផ្លាញ វាមិនមែនគ្រាន់តែជាការបាត់បង់ថ្មប៉ុណ្ណោះទេ ប៉ុន្តែ គឺមនុស្សជាតិទាំងមូលដែលបាត់បង់តម្លៃរបស់ខ្លួនបន្តិចម្តងៗ»។

សូមបញ្ជាក់ថា កិច្ចប្រជុំកំពូលហ្វ្រង់កូហ្វូនីលើកទី២០ នៅរាជធានីភ្នំពេញ បានបិទបញ្ចប់ដោយជោគជ័យ ជាមួយនឹងការអនុម័ត «សេចក្តីថ្លែងការណ៍ទីក្រុងភ្នំពេញ» ដែលជាត្រីវិស័យថ្មីក្នុងការពង្រឹងសាមគ្គីភាព កិច្ចសហប្រតិបត្តិការសេដ្ឋកិច្ច នវានុវត្តន៍បច្ចេកវិទ្យា និងការថែរក្សាសន្តិភាពក្នុងពិភពនិយាយភាសាបារាំង៕ ដោយ៖ យា ចិន្តាខន្តី






សម្ដេចធិបតី ហ៊ុន ម៉ាណែត គូសបញ្ជាក់ថា កិច្ចប្រជុំកំពូលហ្វ្រង់កូហ្វូនី លើកទី២០ បានសម្រេចបង្កើតការិយាល័យសហប្រតិបត្តិការសេដ្ឋកិច្ចហ្វ្រង់កូហ្វូនី នៅទីក្រុងភ្នំពេញ.....


AKP ភ្នំពេញ ថ្ងៃទី១៦ ខែវិច្ឆិកា ឆ្នាំ២០២៦

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានគូសបញ្ជាក់ថា កិច្ចប្រជុំកំពូលហ្វ្រង់កូហ្វូនី លើកទី២០ បានសម្រេចបង្កើតការិយាល័យសហប្រតិបត្តិការសេដ្ឋកិច្ចហ្វ្រង់កូហ្វូនី នៅទីក្រុងភ្នំពេញ។ ការគូសបញ្ជាក់របស់សម្ដេចធិបតីនាយករដ្ឋមន្រ្ដីបែបនេះ ក្នុងឱកាសថ្លែងពិធីបិទកិច្ចប្រជុំកំពូលហ្វ្រង់កូហ្វូនីលើកទី២០ នារសៀលថ្ងៃទី១៦ ខែវិច្ឆិកា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍អន្ដរជាតិជ្រោយចង្វារ រាជធានីភ្នំពេញ។

សម្ដេចធិបតី ហ៊ុន ម៉ាណែត បានលើកឡើងថា ការិយាល័យនេះ នឹងត្រូវតែក្លាយជាស្ពានតភ្ជាប់មួយ ជាមួយអាស៊ាន និងជាមួយសហគមន៍ប៉ាស៊ីហ្វិក ហើយក៏ក្លាយជាការអំពាវនាវសម្រាប់ការការពារបេតិកភណ្ឌវប្បធម៌ ផងដែរ។ សម្ដេចធិបតីបានរំលេចផងដែរថា ពេលវេលា និងការចងចាំ បានឆ្លងកាត់ប្រជាជាតិជាច្រើនដែលបានតស៊ូឆ្លងកាត់អតីតកាល ហើយអ្វីដែលបន្សល់ទុកទាំងនោះ គឺការផ្ទេរបន្តទៅជំនាន់ក្រោយ​។ សម្ដេចធិបតីនាយករដ្ឋមន្រ្ដីក៏បានបញ្ជាក់ថា៖ «ការឈានដល់កុងសង់ស៊ីស (ការព្រមព្រៀងជាឯកច្ឆន្ទ) ទាមទារឱ្យមានការអត់ធ្មត់ ហើយកុងសង់ស៊ីសពិតប្រាកដ មិនមែនលុបបំបាត់ភាពខុសគ្នារបស់យើងទេ ប៉ុន្តែវាធ្វើឱ្យយើងអាចឆ្លងផុតភាពខុសគ្នាទាំងនោះបាន»។

ក្នុងនាមប្រជាជនកម្ពុជា និងរាជរដ្ឋាភិបាល សម្ដេចធិបតីនាយករដ្ឋមន្រ្ដីក៏សូមថ្លែងអំណរគុណចំពោះឯកឧត្តម លោកជំទាវ អស់លោក លោកស្រី គ្រប់រូប ដែលបានអញ្ជើញមកកាន់ទីក្រុងភ្នំពេញ ហើយវត្តមានរបស់អ្នកទាំងអស់គ្នា គឺជាកិត្តិយសដ៏ឧត្តុង្គឧត្តម ហើយក៏ជាសញ្ញានៃទំនុកចិត្ត និងមិត្តភាពផងដែរ។

ក្នុងឱកាសនោះ សម្ដេចធិបតី ហ៊ុន ម៉ាណែត បានថ្លែងបញ្ជាក់ទៀតថា សេចក្តីថ្លែងការណ៍មួយ គឺគ្រាន់តែជាការចាប់ផ្តើមប៉ុណ្ណោះ ហើយអត្ថបទឯកសារនៃទីក្រុងភ្នំពេញ នឹងមានតម្លៃទៅតាមអ្វីដែលយើងនឹងអនុវត្តនៅថ្ងៃស្អែក​។ សម្ដេចធិបតីបានសង្កត់ធ្ងន់ថា ពិភពលោកកំពុងសម្លឹងមើលមកយើង មិនមែនមើលលើអ្វីដែលយើងបានសរសេរនៅទីនេះទេ ប៉ុន្តែមើលលើអ្វីដែលយើងនឹងធ្វើចាប់ពីពេលនេះតទៅ។ ការកសាងសន្តិភាពត្រូវការពេលវេលារាប់ជំនាន់មនុស្ស ប៉ុន្តែការបំផ្លាញវាវិញ ត្រូវការពេលត្រឹមតែប៉ុន្មានថ្ងៃប៉ុណ្ណោះ។

ទន្ទឹមនេះ សម្ដេចធិបតីនាយករដ្ឋមន្រ្ដីបានអះអាងបន្ថែមថា៖ «យើងបានមកដល់ទីនេះ ជាមួយនឹងប្រវត្តិសាស្ត្រ និងភាពខុសគ្នារបស់យើង ហើយយើងត្រឡប់ទៅវិញ ជាមួយនឹងទំនួលខុសត្រូវរួមគ្នាមួយ គឺធ្វើយ៉ាងណាឱ្យស្មារតីនៃទីក្រុងភ្នំពេញ ស្ថិតនៅជាប់ជានិច្ចក្នុងសកម្មភាព ក្នុងការសម្រេចចិត្ត និងក្នុងជីវិតរបស់យើង»៕ ដោយ៖ រិទ្ធី





Sunday, 15 November 2026


នាព្រឹកថ្ងៃទី១៦ ខែវិច្ឆិកា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានជួបពិភាក្សាការងារទ្វេភាគីជាមួយ ឯកឧត្តម Nikol Pashinyan នាយករដ្ឋមន្ត្រីនៃសាធារណរដ្ឋអាមេនី ក្នុងឱកាសដែលឯកឧត្តមនាយករដ្ឋមន្ត្រីអញ្ជើញចូលរួមក្នុងកិច្ចប្រជុំកំពូលហ្វ្រង់កូហ្វូនីលើកទី២០ នៅរាជធានីភ្នំពេញ ព្រះរាជាណាចក្រកម្ពុជា ចាប់ពីថ្ងៃទី១៥ ដល់ថ្ងៃទី១៦ ខែវិច្ឆិកា ឆ្នាំ២០២៦។

ក្នុងឱកាសនៃជំនួប ឯកឧត្តមនាយករដ្ឋមន្ត្រីអាមេនី បានថ្លែងអំណរគុណយ៉ាងជ្រាលជ្រៅដល់រាជរដ្ឋាភិបាល និងប្រជាជនកម្ពុជា ចំពោះការស្វាគមន៍យ៉ាងកក់ក្តៅចំពោះឯកឧត្តម និងគណៈប្រតិភូ ព្រមទាំងបានសម្តែងនូវការអបអរសាទរ និងកោតសរសើរចំពោះការរៀបចំយ៉ាងល្អនៃកិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជាបានធ្វើជាម្ចាស់ផ្ទះនាឱកាសនេះ។ ជាមួយគ្នានេះ ឯកឧត្តមក៏បានសម្តែងនូវការវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការរវាងអាមេនី និងកម្ពុជា ព្រមទាំងបានគូសបញ្ជាក់ថា ជំនួបពិភាក្សាការងាររវាងឯកឧត្តម និង សម្តេចធិបតី នាពេលនេះ នឹងបង្កើតនូវកាលានុវត្តភាពថ្មីបន្ថែមទៀត ដើម្បីបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែរីកចម្រើនបន្ថែមទៀត។

ជាការឆ្លើយតប សម្តេចធិបតី បានថ្លែងអំណរគុណដល់ឯកឧត្តមនាយករដ្ឋមន្ត្រីអាមេនី និងគណៈប្រតិភូ ដែលបានអញ្ជើញចូលរួមកិច្ចប្រជុំកំពូលហ្វ្រង់កូហ្វូនីលើកទី២០ នៅកម្ពុជានាពេលនេះ។ សម្តេចធិបតី ក៏បានសម្តែងនូវការពេញចិត្តចំពោះទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ព្រមទាំងបានគូសបញ្ជាក់ថា នៅមានវិស័យសំខាន់ៗជាច្រើនទៀត ដែលកម្ពុជា និងអាមេនីអាចពង្រឹង និងពង្រីកកិច្ចសហប្រតិបត្តិការជាមួយគ្នា ដើម្បីផលប្រយោជន៍ប្រជាជន និងប្រទេសទាំងពីរ។

សម្តេចធិបតី និងឯកឧត្តមនាយករដ្ឋមន្ត្រីអាមេនី ក៏បានពិភាក្សា និងផ្លាស់ប្តូរយោបល់ ក្នុងការជំរុញកិច្ចសហប្រតិបត្តិការលើវិស័យសំខាន់ៗរវាងប្រទេសទាំងពីរ រួមមាន៖ សេដ្ឋកិច្ច ពាណិជ្ជកម្ម សន្តិសុខ និងការពារជាតិ ជាដើម។

សម្តេចធិបតី បានជម្រាបជូនឯកឧត្តមនាយករដ្ឋមន្ត្រីអាមេនី អំពីការវិវត្តថ្មីៗនៃស្ថានការណ៍ព្រំដែនកម្ពុជា-ថៃ ដោយបានសង្កត់ធ្ងន់អំពីការប្តេជ្ញាចិត្ត និងជំហររបស់កម្ពុជា ក្នុងការបន្តប្រកាន់យកយន្តការដោះស្រាយបញ្ហាព្រំដែនដោយសន្តិវិធី ដោយផ្អែកលើច្បាប់អន្តរជាតិ និងអនុលោមតាមអនុសញ្ញា សន្ធិសញ្ញា និងកិច្ចព្រមព្រៀងនានាដែលមានស្រាប់រវាងប្រទេសទាំងពីរ៕ ផ្សាយ៖ កន ចំណាន



កម្ពុជា ជំរុញឱ្យបញ្ចូលបញ្ហាព្រំដែនកម្ពុជា-ថៃ និងជោគវាសនាជនភៀសសឹកជាង ២ម៉ឺននាក់ ទៅក្នុងសាររបស់អាយប៉ាដោយជោគជ័យ.....


 គណៈប្រតិភូសភាកម្ពុជា បានទទួលការគាំទ្រជាឯកច្ឆន្ទពីបណ្តាប្រទេសជាសមាជិកទាំងអស់ ក្នុងការបញ្ជ្រាបកថាខណ្ឌអាទិភាពស្តីពីបញ្ហាព្រំដែនកម្ពុជា-ថៃ និងជោគវាសនាជនភៀសសឹកជាង ២០.០០០នាក់ ទៅក្នុងសារផ្លូវការរបស់អាយប៉ា ជូនប្រមុខដឹកនាំអាស៊ាន។ ជោគជ័យការទូតសភានេះ ធ្វើឡើងក្នុងកិច្ចប្រជុំទល់មុខគ្នារវាងប្រមុខដឹកនាំអាស៊ាន និងថ្នាក់ដឹកនាំអាយប៉ា (ASEAN-AIPA Interface) លើកទី១៥ និងពិធីបើកកិច្ចប្រជុំកំពូលអាស៊ានលើកទី៤៩ នាថ្ងៃទី១៥ ខែវិច្ឆិកា ឆ្នាំ២០២៦ នៅរដ្ឋធានីម៉ានីឡា ប្រទេសហ្វីលីពីន ដែលដឹកនាំដោយ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភាកម្ពុជា និងជាប្រធានក្រុមសភាជាតិអាយប៉ាកម្ពុជា អមដំណើរដោយ ឯកឧត្តម ទី សុគន្ធ។

ក្នុងសាររបស់អាយប៉ា ដែលអានដោយ ឯកឧត្តម ហ្វូស្ទីណូ បូជី ជី. ឌី ទី៣ (Faustino Bojie G. Dy III) ប្រធានរដ្ឋសភាហ្វីលីពីន ជូនប្រមុខរដ្ឋ និងប្រមុខរដ្ឋាភិបាលអាស៊ាន ក្រោមអធិបតីភាពប្រធានាធិបតីហ្វីលីពីន ឯកឧត្តម ហ្វឺឌីណាន់ អ័រ ម៉ាកូស ជេអ័រ (Ferdinand R. Marcos Jr.) បានលើកទឹកចិត្តឱ្យភាគីកម្ពុជា-ថៃ គោរព និងអនុវត្តដោយស្មោះត្រង់នូវបទឈប់បាញ់ កិច្ចព្រមព្រៀងសន្តិភាពទីក្រុងគូឡាឡាំពួ (២៦ តុលា ២០២៥) សេចក្តីថ្លែងការណ៍រួម (២៧ ធ្នូ ២០២៥) និងកិច្ចព្រមព្រៀងរួមហ្វូសៀន (២៩ ធ្នូ ២០២៥)។

ទន្ទឹមនឹងនេះ សាររបស់អាយប៉ាក៏បានបញ្ជាក់ការគាំទ្រចំពោះតួនាទីក្រុមអ្នកសង្កេតការណ៍អាស៊ាន (ASEAN Observer Team) និងជំរុញឱ្យភាគីទាំងពីរសម្រួលដល់ការវិលត្រឡប់ទៅកាន់លំនៅឋានវិញរបស់ពលរដ្ឋភៀសសឹកជាង ២០.០០០នាក់ ប្រកបដោយសុវត្ថិភាព ស្ម័គ្រចិត្ត សេចក្តីថ្លៃថ្នូរ និងធានាការពារសិទ្ធិជាមូលដ្ឋានរបស់ពួកគេ។

តួលេខជនភៀសសឹកជាង ២០.០០០នាក់នេះ មិនមែនជាការលើកឡើងតែម្ខាងរបស់កម្ពុជាឡើយ ប៉ុន្តែត្រូវបានបញ្ជាក់ជាផ្លូវការនៅក្នុងសេចក្តីថ្លែងការណ៍របស់លោក Tom Andrews អ្នករាយការណ៍ពិសេសអង្គការសហប្រជាជាតិ ស្តីពីស្ថានភាពសិទ្ធិមនុស្សនៅកម្ពុជា កាលពីថ្ងៃទី៣១ ខែកក្កដា ឆ្នាំ២០២៦។

ក្រៅពីបញ្ហាព្រំដែន កម្ពុជាក៏បានរួមចំណែកដាក់បញ្ចូលធាតុចូលយុទ្ធសាស្ត្រសំខាន់ៗចំនួន ៤បន្ថែមទៀតទៅក្នុងសាររបស់អាយប៉ា រួមមាន ការពង្រឹងគោលការណ៍គ្រឹះអាស៊ានលើការគោរពអធិបតេយ្យភាព បូរណភាពទឹកដី ការដោះស្រាយជម្លោះដោយសន្តិវិធី និងការពារជនស៊ីវិលជាដាច់ខាត។ ជាមួយគ្នានេះ កម្ពុជាបានជំរុញកិច្ចសហប្រតិបត្តិការឆ្លើយតបបញ្ហាប្រឈមថ្មីៗ ដូចជា អភិបាលកិច្ចបញ្ញាសិប្បនិម្មិត (AI) ការប្រយុទ្ធប្រឆាំងឧក្រិដ្ឋកម្មបច្ចេកវិទ្យាឆ្លងដែន ការស៊ើបអង្កេតហិរញ្ញវត្ថុ ការរឹបអូសទ្រព្យសម្បត្តិពីបទល្មើស និងការការពារជនរងគ្រោះ។

លើសពីនេះ កម្ពុជាបានសង្កត់ធ្ងន់លើការលើកកម្ពស់ការអភិវឌ្ឍប្រកបដោយបរិយាបន្ន និងចីរភាព ដើម្បីផ្តល់ផលប្រយោជន៍ជាក់ស្តែងដល់កសិករ សហគមន៍ជនបទ ស្ត្រី យុវជន និងជនមានពិការភាព ក្រោមស្មារតី «មិនទុកនរណាម្នាក់ចោល» ព្រមទាំងការពង្រឹងកិច្ចសហប្រតិបត្តិការអន្តរសភា ដើម្បីប្រែក្លាយការប្តេជ្ញាចិត្តថ្នាក់តំបន់ ទៅជាសកម្មភាពជាក់ស្តែងនៅថ្នាក់ជាតិ ស្របតាមរដ្ឋធម្មនុញ្ញរបស់សភាសមាជិកនីមួយៗ។កិច្ចប្រជុំទល់មុខគ្នារវាងប្រមុខដឹកនាំអាស៊ាន និងថ្នាក់ដឹកនាំអាយប៉ា គឺជាយន្តការប្រចាំឆ្នាំដ៏មានសារៈសំខាន់បំផុត ដែលឆ្លុះបញ្ចាំងពីភាពជាដៃគូរវាងស្ថាប័ននីតិប្រតិបត្តិ និងនីតិប្បញ្ញត្តិ ក្នុងការនាំយកបំណងប្រាថ្នាពិតប្រាកដរបស់ប្រជាពលរដ្ឋទៅកាន់ថ្នាក់ដឹកនាំកំពូល ដើម្បីកសាងសហគមន៍អាស៊ានមួយប្រកបដោយភាពធន់ បរិយាបន្ន ចីរភាព និងវិបុលភាព៕